“Hunarmand” uyushmasi a’zosi, farg‘onalik kandakor Zokirjon Gʻofurov tomonidan yaratilayotgan durdona asarlari, noyob san’at namunali sifatida nafaqat yurtimizda, balki ko‘plab xorijiy mamlakatlarda ham ma’lum va mashhur.
U milliy kandakorlik san’ati, xususan, mis, latun, melxior kabi xomashyolardan turfa buyumlar yaratish yo‘lida samarali mehnat qilmoqda, izlanmoqda. Usta ijodiy ish amallari bilan bog‘liq ko‘plab namunalar O‘zbekiston hunarmandchiligi va amaliy san’ati ensiklopediyasidan o‘rin oldi.
Oftoba, patnis, idishlar to‘plami, choy idish, kosa, qutilar yasalish uslubi, nozik va o‘ziga xos ko‘rinishlari bilan e’tiborni tortadi. Ayniqsa, arab yozuvli bezaklardan mohirona foydalanishishi mahsulotlarni yana bejirim va benazir qiladi. Ustaning qo‘llarida metal go‘yoki jonlangandek, jimjimador naqshlar esa unga sharqona o‘ziga xoslik bag‘ishladi.
– Har bir mahsulot yaratilishi uchun misgardan alohida mehnat, qunt talab etadi, – deydi usta. – Bitta oddiy mis piyola tayyor bo‘lguncha oylab vaqt sarflashga to‘g‘ri keladi. Shu bos xar bir buyum o‘ziga xos, bir-birini takrorlamaydi. Mahsulotlarimiz nafaqat ichki, balki tashqi bozorda ham o‘z o‘rnini topgan.
Zokirjon o‘z ijodiy faoliyatini taniqli kandakor usta Maqsudali Mamdaliyev qo‘lida boshlagan. Gʻamxo‘r ustoz shogirdiga metal o‘ymakorligining barcha sir-sinoatlarini o‘rgatdi.
Shuningdek, respublika rassomchilik bilim yurti, Toshkent teatr va rassomchilik instituti san’atshunoslik bo‘limida olgan nazariy bilimlar yosh ustaning ijodiy faoliyatini yanada kengaytirdi, amaliyot bilan mustahkamladi.
Yosh hunarmandlarga ko‘hna san’at an’analarini o‘rgatib kelayotgan mohir qo‘llar ustaxonasi yurtimiz va xorijdan kelgan mehmonlar bilan hamisha gavjum, fayzli. Bu hamkorlik ularni ijodkorlik va izlanishga undamoqda.
Rasuljon Kamolov,
“Yangi O‘zbekiston” muxbiri.
